Жамбыл облысының тұрғыны еңбек кітапшасындағы фамилиясының дұрыс жазылмауына байланысты зейнетақы төлемдерін беруден Жамбыл облысы Жуалы аудандық зейнетақы төлеу орталығы бас тартқан, деп хабарлайды aqshamnews.kz.
Осы жағдайға қатысты ол аудандық сотқа талап арыз берді.
Жуалы ауданында тұратын азамат 1985 жылдан 1998 жылға дейін ұжымдық шаруашылықта жұмыс істеген. Жұмысшы зейнетақы құжаттарын ресімдеуге келген кезде, зейнетақы орталығы еңбек кітапшасында фамилиясының дұрыс жазылмағанын анықтап, зейнетақы төлемдерін беруден бас тартқан.
Ер адам бұл мәселені шешу үшін сотқа жүгінді. Жуалы аудандық соты архивтік анықтаманы қарап, оның жеке деректерін және аталған шаруашылықтағы жұмысын растады.
«Сот талап арызды қанағаттандырып, еңбек кітапшасының сол азаматқа тиесілі екендігін мойындады», – деп хабарлады Жуалы аудандық сотының баспасөз қызметі.
Сот шешімі әлі заңды күшіне енген жоқ.