Алматыдағы Сайран көлінің жағасында өткен тазалық акциясы қоғамның түрлі өкілдерін бір арнаға тоғыстырды. Қала тазалығын сақтауға шыққан жандардың арасында ҚР Еңбек сіңірген қайраткері, актриса Лиза Серікова, актер Бақыт Тушаев сынды талантты өнер иелері қоршаған ортаның жай-күйіне бейжай қарауға болмайтынын айтып, жұртты тазалықты сақтауға үндеді, деп хабарлайды Aqshamnews.kz тілшісі.
"Біз сахнада елге ой салуға тырысамыз. Бірақ бұл жолы шынайы өмірдің сахнасындамыз. Табиғат – бәрімізге ортақ. Сайран секілді сулы-нулы орындарды сақтап қалу – әр азаматтың міндеті", – деді актриса Лиза Серікова.
Ал театр және кино актері Бақыт Тушаев болса, тазалық мәдениеті ең алдымен отбасынан басталуы тиіс деген пікірде:
"Адамның мәдениеттілігі – оның қоқысты қайда тастағанынан-ақ көрінеді. Табиғатқа жанашырлықты тек сөзбен емес, нақты әрекетпен көрсетуіміз керек. Бұл – ұрпақ алдындағы жауапкершілік", – деді ол.
Актерлердің айтуынша, мұндай акциялар көпшілікке ой салып, табиғатты көздің қарашығындай сақтауға себеп болады. Көл жағасын тазалауға келгендер күні бойы арнайы сөмкелермен қоқыс жинап, Сайранға қайта көрік беруге атсалысты.