Әл-Фараби атындағы Қазақ ұлттық университетінің экохабында «Таза Қазақстан» бастамасы аясында «Zero Waste Campus» бағдарламасының іс-шаралары өтіп жатыр. Жоба кампустарда қалдықсыз өмір салтын насихаттауға және студенттер арасында экологиялық мәдениетті қалыптастыруға бағытталған.
Қатысушылар «Zero Waste» қағидаларымен танысып, қалдықтарды сұрыптау бойынша тәжірибеден өтті. Пластикалық қалдықтарды қайта өңдеу үлгілері көрсетіліп, саналы тұтыну мәдениеті түсіндірілді. Студенттер бөтелке қақпақтарын сұрыптап, арнайы цехтағы ұсақтау және түрлі-түсті плиталарға айналдыру процесін бақылады. Осы плиталардан үстел, орындық, интерьер бұйымдары жасалады.
Кампус аумағына қалдықтарды бөлек жинайтын фандоматтар орнатылған. «ECO Network» компаниясының жобалар жетекшісі Хамза Сафаровтың айтуынша, экохаб – компания мен ҚазҰУ арасындағы табысты ынтымақтастықтың жемісі. Мұнда кез келген адам қалдықтарын өткізіп, олардан дайындалған бұйымдар жасай алады. Сонымен қатар жасыл экономика тақырыбында шеберлік сабақтары мен интерактивті оқыту өткізіледі.
Жобаны үйлестіруші, ЮНЕСКО-ның тұрақты даму кафедрасының аға оқытушысы Әйгерім Керімқұлова биыл экохаб жұмысына жүздеген студенттердің тартылғанын айтты. Ал студенттердің өздері экологиялық бастаманың маңызын ерекше атап өтті:
-
Мадина Естаева, журналистика факультетінің 1-курс студенті:
«Экохаб жай ғана акция емес, ол – экологиялық мәдениет қалыптастырудың нақты қадамы. Қалдықтарды қайта өңдеу арқылы біз климатқа келетін зиянды азайтамыз». -
Рамина Ибрагимова, экология факультетінің 1-курс студенті:
«Бұл тәжірибе мен үшін өте құнды. Волонтер ретінде қалдықтарды сұрыптау – болашақ мамандығым үшін үлкен мектеп».
ҚазҰУ экохабы жастардың экология саласындағы тәжірибе алмасу және диалог алаңына айналды. «Zero Waste Campus» бастамасы – таза әрі тұрақты болашаққа қадам және студенттердің табиғатты қорғаудағы белсенділігінің айқын дәлелі.