Республикалық экологиялық акция «Таза Қазақстан» аясында елордамыздың Байқоңыр ауданында күзгі көгалдандыру жұмыстары басталды. Атап айтқанда, Тәшенев көшесінің бойында 100 түп қарағай мен 30 түп қайың отырғызылды.
Акцияға 100-ге жуық адам қатысып, қаланың экологиясын жақсартуға өз үлесін қосты. Олардың қатарында Ұлттық ұланның әскери қызметшілері, жергілікті тұрғындар және Байқоңыр ауданы әкімдігі аппаратының қызметкерлері болды.
Іс-шараның басты мақсаты – қаланың экологиялық жағдайын жақсарту, жасыл желектер санын арттыру және тұрғындарды табиғатты аялауға шақыру.
Осындай көгалдандыру жұмыстары елорданың басқа аудандарында да жүргізілуде. Еске сала кетсек, Астанада 13 қыркүйектен 11 қазанға дейін дәстүрлі экологиялық айлық өтуде. Бұл кезеңде қала тұрғындары мен ұйымдары аулаларды, көшелерді абаттандыруға атсалыса алады.