Сарқан ауданында ұлттық жоба «Тaзa Қазақстан» шеңберінде абаттандыру жұмыстары жалғасуда. Кезекті күзгі сенбілік Сарқан қаласындағы орталық «Қойтас» саябағында өтті. Шараға жергілікті тұрғындар, мекеме қызметкерлері мен коммуналдық қызмет өкілдері қатысты.
Күні бойы қатысушылар саябақ аумағын қоқыстан тазалап, арықтарды ашты, жолдарды сыпырып, ағаштарға күтім жасады, түскен жапырақтар мен қалдықтарды шығарды. Оған барлығы 70-ке жуық адам қатысып, 2 арнайы техника бірлігі жұмылдырылды.
Әртүрлі мекеме қызметкерлерінің белсенділігі мен ұйымшылдығы айрықша атап өтілді. Олардың еңбегі қоғамдық кеңістіктің шынайы өзгеруіне үлгі болды.
«Қойтас» саябағы қала тұрғындарының сүйікті демалыс орындарының бірі болғандықтан, оның абаттандырылуына ерекше көңіл бөлінуде. Мұндай сенбіліктер тек экологиялық жағдайды жақсартумен шектелмей, тұрғындарда табиғатқа ұқыпты қарау мәдениетін де қалыптастырады.
Еске сала кетсек, ұлттық жоба «Тaзa Қазақстан» елімізде таза әрі қауіпсіз экологиялық орта құруды көздейді. Ол жоба жасына, кәсібіне немесе әлеуметтік мәртебесіне қарамастан, барша азаматты ортақ мақсат – табиғатты қорғау және қалалар мен ауылдарды таза ұстау ісіне біріктіреді.