Астанада «Таза Қазақстан» республикалық экологиялық акциясы аясында кезекті «Таза бейсенбі» сенбілігі өтті. Акцияға мамандандырылған сәбилер үйінің қызметкерлері, студенттер мен еріктілер, сондай-ақ «Amanat» партиясының жастар қанатының мүшелері атсалысты.
Олар бірге сәбилер үйінің ауласын тазалап, ойын алаңын абаттандырды, ағаштар мен гүлдер отырғызып, тәрбиеленушілерге жайлы әрі қауіпсіз орта қалыптастырды. Ұйымдастырушылардың айтуынша, мұндай іс-шаралар тек тазалықты насихаттап қана қоймай, қоғамның әлеуметтік жауапкершілігін арттыруға ықпал етеді.
Волонтёр Диас Есенгельдиев атап өткендей:
– Бұл акция, ең алдымен, жастар үшін маңызды. Ол бізді біріктіріп қана қоймай, экологияға құрметпен қарауды, ұйымдарға қол ұшын беруді үйретеді. Бүгінгі таңда біз сәбилер үйіне көмек көрсетіп, балаларға қуаныш сыйладық, – деді ол.
Керек дерек
-
Акция 2023 жылы басталып, жыл сайын республика көлемінде тұрақты түрде өткізіліп келеді.
-
2024 жылы ел бойынша 1 миллионнан астам қазақстандық сенбіліктерге қатысып, 120 мың тоннадан астам қоқыс жиналды.
-
Тек елордада ғана 15 мыңнан астам адам қатысқан сенбіліктер барысында саябақтар, аулалар мен қоғамдық орындар тазартылды.
-
«Таза бейсенбі» форматы – әр аптада мемлекеттік мекемелер, жастар ұйымдары және еріктілердің бірлескен жұмысы ретінде дәстүрге айналып келеді.