«Таза Қазақстан» бастамасы аясында республика көлемінде экология департаменттері мен полиция бөлімшелері бірлесіп, автокөліктерден бөлінетін зиянды заттардың деңгейін тексеру мақсатында «Таза ауа» рейдтері басталды.
Шымкент қаласында өткен рейд барысында Темірлан тас жолында арнайы газ анализаторларының көмегімен бензин, газ және дизель қозғалтқыштары бар көліктердің шығарындылары тексерілді. Нәтижесінде көміртегі тотығы, көмірсутектер және түтін деңгейі анықталды.
Барлығы 22 автокөлік тексеріліп, оның 8-інде (4 дизельді және 4 газ-бензинді) ауаға тарайтын газдардың нормадан артық екені белгілі болды. Тәртіп бұзған жүргізушілер ҚР Әкімшілік құқық бұзушылық туралы кодексінің 334-бабы бойынша жауапкершілікке тартылды.
Мамандардың айтуынша, мұндай рейдтер қыркүйек пен қазан айларында еліміздің өзге өңірлерінде де жалғасады. Экологиялық қызмет өкілдері тұрғындарға көліктерге уақытылы техникалық қызмет көрсетудің маңызын ескертті. Өйткені дұрыс күтім жасалған көлік зиянды шығарындыларды азайтып, ауаның сапасын жақсартуға ықпал етеді.