маңызды құжатқа шолу жасалды
Республика күні қарсаңында Алматы қаласы Қоғамдық даму басқармасы және Педагогикалық Ғылымдар академиясының ұйымдастыруымен 19 қазан күні Достық үйінде «Егемендік декларациясы – тәуелсіздік бастауы» тақырыбында ғылыми-практикалық конференциясы өтті.
Іс-шараға XII шақырылған Қазақстан Республикасы Жоғарғы Кеңесінің депутаттары, зиялы қауым, ғылыми және шығармашылық саласының қайраткерлері мен Алматы қаласы мәслихаты депутаттары, сондай-ақ, Алматыдағы ЖОО және колледждердің профессор-оқытушылар қауымы, магистранттар мен докторанттар, БАҚ құралдары өкілдері қатысты. Іс-шара аясында ҚР Президенті архиві ұйымдастыруымен тақырыптық көрме ұйымдастырылды.
Мақсаты – тәуелсіздіктің бастауы болған құжаттың маңыздылығын айшықтап, егемендікті нығайтып, елді одан әрі дамытуға бағыттайтын іс-шараның халықтың әл- ауқатын арттыруға және саяси трансформацияны іске асыруда маңызы зор.
Конференцияда тарихи күннің басы-қасында болып, құнды құжаттың қабылдануына атсалысқан Жоғарғы Кеңес Төралқасының мүшесі, комитет төрағасы, XII шақырылған Қазақ КСР Жоғарғы Кеңесінің депутаты, ҚР Мемлекеттік сыйлықтың лауреаты Оразалы Сәбден Тәуелсіздік алған уақыттағы сәттерін ерекше тебіреніспен еске алды.
– Қазақ КСР Жоғары Кеңесте егемендік туралы Декла рация қабылдаған сәт әлі есімізде. Тәуелсіздік алған кездегі ішкі толқынысымыз көзімізден жас болып шықты. Себебі, бұл ата-бабаларымыз аңсаған, армандаған егемендік болатын. Біздің бабаларымыз қарудың күшімен елді қорғаса, біз білімнің күшімен егемендікке ұмтылдық. Бұл күн қазақ елінің азаттық күні, бұдан артық күн жоқ, – деді ҚР ҰҒА академигі.
Өз кезегінде тарих ғылымдарының докторы, профессор Георгий Кан маңызды құжатты жазған азаматтарды құрметтеп, есте сақтауымыз керек екенін тілге тиек етті:
– Біріншіден, Декларациядан кейін заң қабылданады. Елдің тұтастығы пайда болады. Ал екіншіден, кез келген адам Республика күнін ерекше қабылдайды. Біз осы декларацияны жазған адамдарды құрметтеп есімізд е сақтауымыз керек. Себебі, осы XII Қазақ КСР Жоғарғы Кеңесіне шақырылған депутаттар Егемендікке қол жеткізу үшін талай маңдай терін төкті, – деді.
Ел тәуелсіздігінің бастауы болған Егемендік туралы Декларацияның маңызын айшықтап, мәнін түсіндірген конференция жастардың елін, жерін сүюге, егемендіктің қадірін түсінуіне ерекше әсер етті.