Алмалы ауданындағы №167 мектепте “Тәуелсіздік қос тағаны: Конституция және Тәуелсіздік рухы» атты қалалық семинар өтті. Өткізіліп отырған іс-шараның негізгі мақсаты – жас ұрпаққа Тәуелсіздік тарихының маңызын түсіндіріп, Конституцияның ел дамуындағы рөлі мен тарихи мәнін айқындау болды. Семинарға мектеп әкімшілігі, ұстаздар қауымы мен жоғары сынып оқушылары қатысты.
Шара барысында қатысушылар Тәуелсіздік жылдарындағы елдің жеткен жетістіктері, Ата Заңымыздың қоғамдағы әділдік пен тұрақтылықтың кепілі ретіндегі маңызы туралы мазмұнды ойларымен бөлісті. Сонымен қатар 1986 жылғы Желтоқсан көтерілісі жайында деректер келтіріліп, ержүрек жастардың ерлігі мен өр рухына тағзым жасалды. Оқушылар тарихи сахналық көріністер қойып, Ар мен Намыс, Ерлік пен Азаттық тақырыбындағы өлеңдер оқыды. Семинар жас буынның отансүйгіштік сезімін нығайтып, ел тарихына деген құрметін арттыруға бағытталған тағылымды жиын болды. Кездесуге келген Ғ.Сәдібеков, Н.Керейұлы, Ә.Ахатұлы, Э.Жұмабекқызы, Н.Сүйінов, Р,Жүсіпова, Д.Аманжол тәуелсіздіктің қадірін білу- әрбір қазақстандықтың басты борышы екенін айта келе, жастарды елін сүюге, тарихын құрметтеуге шақырды. Шара соңында мектеп басшысы Ғалия Нәлібаева ұжым атынан ризашылығын білдірді.