15 мыңнан астам жұмыс орны және жыл сайын 1 трлн теңгеден асатын экономикалық тиімділік — тау туризмін дамыту Алматы экономикасының жаңа қозғаушы күштерінің біріне айналуы мүмкін.
Оның пайдасын курорттар ғана көрмейді. Туристер саны қонақ үйлерге, мейрамханаларға, көлікке, сауда мен қызмет көрсету саласына және шағын бизнеске қосымша сұраныс тудырады.
Тауда демалуға деген сұраныс қазірдің өзінде артып келеді. Шетелдік туристердің 42 пайыздан астамы Алматыны белсенді демалыс үшін таңдайды. Соңғы алты жылда таулы аумақтарға келушілер саны 4,5 есе өсіп, жылына шамамен 1 млн адамға жетті. Ал биыл келушілер саны 1,5 млн адамнан асады деп болжанып отыр.
Қала экономикасы үшін туристер саны ғана емес, олардың Алматыда қанша уақыт болатыны да маңызды. Қалада бірнеше күн аялдаған турист қонақ үйлердің, мейрамханалардың, көліктің, сауда орындарының, жалға беру қызметтерінің, нұсқаушылардың, гидтер мен туристік компаниялардың қызметін пайдаланады. Туристің қалада өткізген әрбір қосымша күні — қала экономикасында қалатын қосымша қаражат.
Тау туризмінің мультипликативтік әсері де осыдан көрінеді. Заманауи курорттың айналасында тұтас іскерлік экожүйе қалыптасады. Оған қонақ үйлер, мейрамханалар, көлік, жабдықтарды жалға беру орындары, құрылыс және инженерлік компаниялар, сауда, қызмет көрсету саласы, сондай-ақ шағын және орта бизнес кіреді. Бұл кәсіпорындардың айналымының өсуі өз кезегінде Алматының салық базасын кеңейтуге мүмкіндік береді.
Алдын ала есептеулер бойынша, Алматы тау кластерінің жобаларын жүзеге асыру 15 мыңнан астам жұмыс орнын ашуға мүмкіндік береді. Ал жиынтық экономикалық тиімділік жыл сайын 1 трлн теңгеден асуы мүмкін.
Бұл ретте тау экономикасы жылына бірнеше аймен ғана шектелмейді. Қысқы маусым жазғы демалыс және белсенді туризм бағыттарымен толықтырылады. Соның арқасында қонақ үйлердің, мейрамханалардың, көлік және сервистік компаниялардың жыл бойғы жүктемесін арттыруға болады. Ең бастысы, маусымдық қана емес, тұрақты жұмыс орындарын қалыптастыруға мүмкіндік туады.
Алматыда инвестиция арқылы қалыптастыру мүмкін емес бірегей артықшылықтар қазірдің өзінде бар. Олар миллиондаған тұрғыны бар мегаполиске іргелес орналасқан әлемдік деңгейдегі тау, халықаралық әуежай және дамыған қонақ үй, мейрамхана мен сервистік инфрақұрылым.
Алматы тау кластерінің міндеті — осы табиғи артықшылықты жыл бойы жұмыс істейтін экономикалық активке айналдыру. Бұл жаңа инвестиция тарту, қонақ үйлер мен қызмет көрсету орындарының жүктемесін арттыру, шағын және орта бизнеске жаңа мүмкіндіктер ашу, жұмыс орындарын құру және Алматының салық базасын ұлғайту.