Алматыда өтіп жатқан «Tartyl Fest» фестиваліне еңбектеген баладан еңкейген қарияға дейін қатысуда. Бүгінгі спорттық шарадан мүмкіндігі шектеулі жандар да қалыс қалмады. 23 жастағы қала тұрғыны Әділжан Дәулетов те турникке тартылып күш сынады.
«Осындай іс-шаралар арқылы салауатты өмір салтын насихаттап, спортымызды дамыта берейік. Барлық қолдап келген, күш сынап, қатысуға келген адамдарға алғыс айтамын. Турникке тартылған кезде қолдауларыңызды сезіндім. Менің тартылғаным толықтай ережеге сәйкес келмесе де, өзімді сынап көрейін дедім. Сондай-ақ барлық ұйымдастырушылар мен «Дара» қорына ерекше алғысымды білдіремін. Қазақстан халқын «Tartyl Fest»-ке барлық қалада қатысуға шақырамын. Жүлделі жеңіске жетпесеңіздер де, өздеріңіз үшін елдің алдында бақ сынап көріңіздер».