«Tartyl Fest» республикалық турнирінің финалистері Қазақстан құрамасы атынан әлем чемпионатына барады
Бұл туралы «Хабар» телеарнасындағы «Оян!» бағдарламасына қатысқан жоба ұйымдастырушыларының бірі Айтым Жақыпов айтты, деп хабарлайды Almaty-akshamy.kz ҚазАқпаратқа сілтеме жасап.
«Қазақстан - осы спорт түрін белсенді дамытып келе жатқан әлемдегі алдыңғы қатарлы ел. Өйткені, Қазақстан «street workout» бағытына мемлекеттік деңгейде қолдау көрсетеді. Ал бұл - көше спорты. Бүгінгі таңда әрбір аулада «workout» бойынша мамандандырылған алаңдар бар. Сонымен қатар, үлкен масштабтағы Тartyl Fest фестивалі әлемде бірінші рет бізде өтіп жатыр. Ең бастысы, Тartyl Fest финалистері бізбен бірге Қазақстан командасының атынан әлем чемпионатына барады», - деді Айтым Жақыпов.
Айта кетейік, алдағы сенбі күні елордада «Tartyl Fest» турнирінің гранд-финалы өтеді. Оған 170-ке жуық адам қатысады деп жоспарлануда.
«Биылғы 18 ақпанда Астана қаласында «Tartyl Fest» спорттық жобасының гранд-финалы өтеді. Оған қатысу үшін іріктелген 180 адамның 170-і келе жатыр. Сондықтан гранд-финал тартысты болады деп ойлаймыз», - деп бөлісті «Dara» дарындыларды қолдау қорының директоры Еркін Ташев.
Оның айтуынша, Tartyl Fest - ТМД деңгейінде өтіп жатқан бірегей спорттық жоба.
«Tartyl Fest – ТМД және оның аумағынан тыс деңгейде өтіп жатқан спорттық жобалардың бірі. Оның авторы - Нұрлан Қоянбаев мырза. Ол кісі бұған дейін берген сұхбаттарында осындай жобаны қолға алатынын айтып жүрген болатын. Содан бізді қолдайтындар табылып, қор ашылып, осы жобаны жүзеге асырып жатырмыз. Бұл спорттық сайыс көпшілікке ұнады. Өйткені, бұл - өте қолжетімді спорт түрі. Бұған арнайы дайындықтың керегі жоқ. Тек спорттық киімің болса болғаны. Қазір кез келген аулада турниктер бар», - деп тоқталды Еркін Ташев.