Алматыда тарихы екі мың жылдан асатын «ағаш пионы» өседі
Алматы ботаникалық бағында тарихы екі мың жылдан асатын, сәнді гүлдері бар, хош иісті «ағаш пионы» өсімдігі өседі, деп хабарлайды Almaty-akshamy.kz ҚазАқпаратқа сілтеме жасап.
Зообақтың мәліметінше, пиондардың шыққан жері – Қытай. Қытай деректері бойынша сәндік өсімдік ретінде пиондарға қызығушылық Хань династиясы кезінде (б.з.б. 206-220) басталған. Осылайша оның тарихы 2 мың жылдан асады. Еуропада бұл өсімдік 18 ғасырда пайда болды және оны кәсіби гүл өсірушілер мен әуесқойлар бағалаған.
«Ағаш пион немесе жартылай бұталы пион (лат. Paeónia × suffruticósa) – пион тұқымдасының (Paeoniaceae) гибридті шыққан өсімдік түрі. Ағаш пионы – биіктігі бір жарым, екі метр болатын жапырақты бұта. Қалың тік сабақтар ақшыл қоңыр түске боялған. Гүлдер сабақтардың ұштарына орналасқан, олардың диаметрі 12-ден 20 сантиметрге дейін немесе одан ұзын болады. Мұндай гүлдер қос, жартылай қос және қарапайым болып бөлінеді. Олар ақ, күлгін, сары, қызғылт, қызыл-қызыл түстерге болады. Ағаш пиондары неғұрлым кәрі болса, соғұрлым жақсы гүлдейді. Шөпті пионға қарағанда ағаш пиондары екі апта бұрын гүлдей бастайды, ұзақтығы 14-21 күнге созылады. Ағаш пиондары суыққа төзімді болып келеді», - деп мәлімдеді зообақтың баспасөз қызметі.
Алматы ботаникалық бағында ағаш пиондары «Шығыс Азия» коллекциялық алаңы мен қоғамдық жерде өседі. Гүлдеген пион бұталарын орталық аллеядан көруге болады.