Достық үйінде Ақмарал Арыстанбекованың «Facets of diplomacy» (Қазақстан дипломатиясының қырлары) атты кітабының тұсаукесері өтті.
Көрнекті қазақ дипломаты, мемлекет және қоғам қайраткері, Қазақстан Республикасының Сыртқы істер министрі, БҰҰ жанындағы Қазақстанның тұңғыш тұрақты өкілі Ақмарал Хайдарқызы Арыстанбекова Қазақстан дипломатиясының тарихына қатысты жаңа кітабын таныстырды. Іс-шараға Алматыдағы БҰҰ өкілдері мен өзге мемлекеттердің Қазақстандағы елшілері қатысты.
– Бұл кітап – жәй ғана оқиғалар тізбегі емес. Бұл – елдің тағдыры шешілген, күрделі де тарихи кезеңдегі Қазақстанның халықаралық байланыстарының қалыптасуы туралы жазылған көркем-деректі шежіре. Кітапта 1980 жылдардан бастап 1991 жылдың желтоқсанында Тәуелсіздік жарияланғанға дейінгі уақыт қамтылған, – деді Ерекше тапсырмалар жөніндегі Елші – ҚР СІМ Алматы қаласы Өкілдігінің басшысы Жәнібек Әбрашов.
Кітаптың бірінші бөлімі халықтық дипломатияға арналған. Мұнда автор Қазақстанның өзге елдермен достық және мәдени байланыстары жайлы бірегей құжат материалдарымен, фотосуреттерімен және естеліктерімен бөліседі. Бұл бөлімнің құндылығы – материалдардың басым бөлігі автордың жеке мұрағатынан алынған. Кітаптың екінші бөлімі Қазақстанның Сыртқы істер министрлігінің тәуелсіздік жарияланғанға дейінгі күрделі кезеңдегі қызметіне арналған. Мұнда дипломатиялық құрылымдардың қалай қалыптасқаны, қандай қиындықтармен бетпе-бет келгені баяндалады.