Халықтық штаб мүшелері Талдықорған қаласындағы Halyk Bank ұжымымен кездесті. Кездесу барысында атом электр станциясының (АЭС) құрылысы және оның ел экономикасына әкелетін пайдасы жан-жақты талқыланды, деп хабарлайды aqshamnews.kz
АЭС бар мемлекеттер, әсіресе уран өндіру және ядролық отын өндірісі дамыған елдер, тек көмір немесе газға негізделген экономикаларға қарағанда әлдеқайда алға озған. Қазіргі уақытта әлемде АЭС-тің пайдасын көріп отырған көптеген мемлекеттер бар.
Жетісу облыстық мәслихат төрағасы Гүлнар Тойлыбаева АЭС қалдықтарының түріне және технологиясына байланысты сақталуы немесе қайта өңделуі мүмкін екенін атап өтті.
– АЭС жылына шамамен 80 кг радиоактивті қалдық шығарады. Бірақ, мысалы, пайдаланылған ядролық отын қалдық болып саналмайды, себебі оны қайтадан энергия көзі ретінде пайдалануға болады. Мұндай қалдықтар арнайы бөшкелерде сақталады, – деді ол.
Қазіргі уақытта әлем бойынша 415 ядролық энергетикалық реактор жұмыс істеп тұр, ал тағы 62-сі салыну үстінде. АЭС-тердің ең көп саны АҚШ-та – 94 реактор, Францияда – 56, Қытайда – 56, және Жапонияда – 12 реактор бар екені де кездесу барысында айтылды.
«AMANAT» партиясының Жетісу облыстық филиалының төрағасы Арыстанғали Арын АЭС құрылысының электр энергиясының тапшылығын азайтуға, тарифтердің өсуін тежеуге, экологияны жақсартуға және энергетикалық тәуелсіздікті қамтамасыз етуге көмектесетін сенімді әдіс екенін жеткізді.
– Көмір станцияларының экология мен адам денсаулығына теріс әсері бар, сондықтан АЭС бұл мәселелерді шешуге маңызды қадам, – деді Арыстанғали Арын.
Банк қызметкерлері атом электр станциясының қоршаған орта мен қоғамға тигізетін ықтимал зиянына алаңдаушылық білдірді. Өз кезегінде, штаб мүшелері атом энергетикасының қауіпсіздігі жаңа деңгейге көтерілгенін түсіндірді. III+ буын реакторлары қосымша қауіпсіздік мүмкіндіктерімен жабдықталған. Бұл технология станса қызметкерлерін эвакуациялау және электр қуатын өшіру жағдайында да жұмыс істеуге мүмкіндік береді.