Қазақстандықтар eGov.kz порталында 073/у формасындағы медициналық анықтаманы алуға мүмкіндік алды. Бұл анықтама адамның көлік құралын басқаруға денсаулығының жарамдылығын растайтын құжат болып табылады, деп хабарлайды aqshamnews.kz
073/у формасындағы медициналық анықтама — көлік жүргізушілеріне қажетті міндетті құжат, ол көлік құралын басқаруға ешқандай қарсы көрсетілімдердің жоқтығын растайды. Бұрын бұл анықтаманы азаматтар қағаз түрінде алатын еді, ол үшін төрт маманнан — терапевт, психиатр-нарколог, офтальмолог және отоларингологтан медициналық тексеруден өту қажет болатын. Қазіргі уақытта бұл қызметті алу оңайлап, азаматтар оны электронды форматта алады, ал цифрлық құжат автоматты түрде бірыңғай дерекқорда сақталады.
Қызметті онлайн алу үшін:
- eGov.kz порталына авторизациядан өтіп, «Денсаулық сақтау — Медициналық көмек» бөлімін таңдаңыз;
- «Медициналық анықтаманы 073/у формасы бойынша беру» қызметін таңдаңыз;
- Сұранысты қолжетімді әдістердің бірімен қолтаңдаңыз.
Бұл жаңашылдық медициналық тексеруден өтуді жеңілдетіп, қажетті анықтаманы электронды түрде алуға мүмкіндік береді.