Жұмысшы мамандықтар жылы: павлодарлық жастарға табысты карьера үлгілері көрсетілді
Павлодардағы Достық үйінде жастар «WorldSkills» чемпионатының жеңімпаздарымен кездесті.
Кездесуде сервис және тамақтану колледжінің студенттері мен түлектері өз жетістіктерімен бөлісті. Олардың арасында 2024 жылғы ұлттық чемпионаттың жеңімпазы Санжар Зейнулла да бар. Ол өңірлік және республикалық деңгейдегі байқауларда топ жарып, Мәскеудің «Синергия» университетінде оқу грантын иеленді. Келер жылы ол Шанхайда өтетін әлемдік «WorldSkills» чемпионатында Қазақстан намысын қорғайды.
Санжардың айтуынша, табысқа жетудің кілті – төзім мен еңбек.
Чемпионатқа дайындықта оған колледж түлегі, бірнеше мәрте жеңімпаз атанған Артур Лейман қолдау көрсеткен. Ал тағы бір түлек – Анатолий Волокитин Түркияда тәжірибеден өтіп, халықаралық сертификатқа ие болған.
Облыстық ҚХА жастар қанатының төрағасы Рамиль Смаиловтың сөзінше, жоба 2019 жылдан бері жүзеге асуда. Жаңартылған форматтың басты мақсаты – оқушыларға табысты жастардың тәжірибесін көрсету және жұмысшы мамандықтардың да үлкен мүмкіндіктерге жол ашатынын дәлелдеу.
Көрмеде студенттердің дипломдары мен марапаттары қойылып, олардың еңбегі мен жетістіктері көпшілікке таныстырылды.