Әбілхан Қастеев атындағы ҚР Мемлекеттік өнер музейінде қазақстандық ұйғыр суретшісі Руслан Юсуповтың (1950-2021) «Шарын аңыздары» атты жеке көрмесі ашылды.
Көрмеге 30-дан астам кескіндеме туындылары ұсынылды.
Руслан Юсуповтың шығармалары өмір құбылыстарын поэтикалық және философиялық тұрғыда бейнелеумен ерекшеленеді. Өнертанушы Р.Ерғалиеваның айтуынша, оның барлық картинасында «мистицизм рухы, болмыстың құпияларын ашуға деген ұмтылыс бар».
«Көрерменге ұсынылған пейзаждық картиналар топтамасы 2005-2013 жылдар аралығында жазылған және елімізде орналасқан Шарын шатқалының бірегей табиғи ландшафтына арналған. Табиғаттың таңғажайып пішіні мен тас рельефтерінде суретші біздің жеріміздің өткенінің керемет жаңғырықтарын ажыратады, шатқалдың үстінде мәңгіліктің рухын жеткізуге тырысады. Картиналардың әрқайсысы кең ассоциативті және метафоралық мағынаға ие», – дейді көрменің кураторы, аталмыш музейдің жетекші ғылыми қызметкері, өнертану кандидаты Амир Жадайбаев.