Қазақстанда экологиялық құндылықтарды қалыптастыру және табиғатқа ұқыпты қарау мәселесі мемлекет саясатының басым бағыттарының біріне айналды. Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын жүзеге асыру аясында бұл салаға айрықша назар аударылып отыр.
Қоршаған ортаны қорғау тек табиғатты сақтау шарасы ғана емес, ол – ұрпақ болашағына деген жауапкершілік. Осы мақсатта елімізде «Таза Қазақстан» экологиялық мәдениетті дамытудың 2024–2029 жылдарға арналған тұжырымдамасы қабылданды. Құжат қоғамда экологиялық ой-сананы жаңғыртып, азаматтардың табиғатқа деген қатынасын түбегейлі өзгертуге бағытталған.
Тұжырымдамада негізгі төрт бағыт айқындалған:
-
халықтың экологиялық ойлау деңгейін және мінез-құлқын жетілдіру;
-
экологиялық жауапты өмір салтын ынталандыру жүйесін құру;
-
экологиялық білім беру мен ағартуды кеңейту;
-
экология тақырыбын ақпараттық кеңістікте белсенді насихаттау.
Экология және табиғи ресурстар министрі Ерлан Нысанбаевтың айтуынша, тұжырымдама азаматтардың табиғатқа деген құрметін күшейтіп, оларды экологиялық мәселелерді шешуге белсенді қатысуға жетелейді.
Мұнда бизнес пен ірі кәсіпорындардың үлесіне де үлкен мән берілген. Олар мемлекетпен қатар қоғамның да сенімді серіктестері ретінде табиғатты қорғау бастамаларына белсенді араласады. Қазірдің өзінде еліміздегі көптеген компаниялар «Таза Қазақстан» аясында тұрақты технологияларды енгізіп, жергілікті деңгейде экологиялық жобаларды жүзеге асырып отыр.
Табиғатты қорғау мәдениетін қалыптастыру – тек бір саланың ғана емес, бүкіл қоғамның міндеті. Бұл бағыттағы жұмыстар жас ұрпаққа экологиялық жауапкершілікті сіңіріп, еліміздің әр азаматын табиғатқа жанашыр болуға шақырады.
«Таза Қазақстан» бастамасы арқылы қоршаған ортаға қамқорлық жасау – ұрпақтар арасындағы алтын көпірге айналып, әділетті әрі жасыл Қазақстанды құруға жол ашады.