Баланы перзентханадан шығарып алу да шоуға айналды
Жуырда Маңғыстау облыстық перинатальдық орталығының өкілдері Facebook арқылы тұрғындарға тосын өтініш жолдады. Елді елең еткізген өтініш мәтінін толық келтіре кетейік.
«Құрметті достар! Қазіргі күні ғимаратымыздың кіреберісінде сәбилерді үйге шығару шарасы шоуға айналды десек болады. Күнде сағат 14.00-ден бастап жұмыс аяғына дейін орталық алды тойдағыдай у-шуға ұласып, қып-қызыл бимен жалғасып, қымбат көліктерге, түрлі аниматорларға толып кетіп, тума-туыс, дос-жаран кішігірім той жасайды. Қанша ескертсек те, қарапайым халық та, аниматорлар да түсінер емес, думанды той күнде жалғасуда. Тұрғындар жаңа босанған ана мен өмір есігін ашқанына бір жеті де толмаған сәбиге ерекше күтім мен тыныштық керек екенін біле тұра, әншілерді, аниматорларды жалдап, дрон ұшырып, өлең айтып, концерт ұйымдастыруды үйреншікті әдетке айналдырып отыр.
Аса құрметті жерлестер! Ең алдымен, біздің орталық – медициналық мекеме. Мұнда тек қуаныш қана емес, басқа да жағдайлар болып жатады. Бір аналар сәбиін құшағына алып қуанып жатса, кейбірі жансақтау бөлімінде өмір үшін күресуде. Әсіресе, өте аз 500,0–700,0 гр салмақпен дүние есігін ашып, 2-3 ай бойына арнайы құрылғыларда оңалтудан өтіп жатқан бөбектерге аса қажетті тыныштық жағдайдың бұзылуы. Музыканың үні дауыс күшейткіші арқылы қатты шығады және ол барлық бөлімге анық естіледі. Шулы жағдай медицина қызметкерлерінің жұмыстарына да кедергі келтіруде. Орталық ғимараты типтік жобамен салынған, сәбилерді шығаруға бөлек, басқа орын қарастыру мүмкіндігі жоқ.
Иә, нәрестені үйге шығару – үлкен қуаныш! Мүмкін, заман талабы да шығар. Дегенмен, әр нәрсенің орны, шегі болуы керек. Перзентхананың алдында той-думан ұйымдастырмай, шығаруға екі-үш жақын адамы келіп, жылдың төрт мезгілінде болатын ыстық пен суықтың, желдің жайсыз әсерінен ана мен баланы сақтап, аман-есен үйіне жеткізіп, қуанышты өз шаңырағыңызда тойласаңыз, нұр үстіне нұр болар еді. Біздің өтінішімізге түсіністікпен қарайды деген сенімдеміз. Рахмет!», делінген жазбада. Астына перзентхана алдын басып алған, шар ұстаған, кернейлеткен, сырнайлатқан отыз-қырық шақты адамның, қаз-қатар тізілген сүліктей қап-қара алты «Гелендвагеннің», күншуақта скамейкада тынығып жатқан аниматорлардың суреттерін қоса жүктепті.
Бұл жазбаны елуден астам адам бөлісіп, қөбі құптаған пікірлер қалдырған. «Дұрыс солай болуы керек. Біреу баласы шетінеп жылап шығады. Біреулердің сол дабыраны жасауға қалтасы көтермейді. Содан ұрыс шығады. Тыйым салу керек». «Қалалық мәслихатпен бекітіп, тыйым салу керек, болды. Бағынбағандар айыппұл арқаласын!». «Қошеметті өз үйінде, ауласында, тойханада жасай беруге болады негізі». «Бұл не мақтангерлік? Даңғойлық!». «Дұрыс тақырып қозғап отырсыз. Әсіресе, баласынан айырылған ана үшін, шаранасы өмір үшін күресіп жатқан ана үшін өте ауыр жағдай. Ана мен баланың қырық күндік шілдесі бар, мұндай жиын-той істегенше, ана мен баланың жағдайын жасасын».
Айтпақшы, бұл жазбаға автор Денсаулық министрлігімен бірге министрімізді де тегтепті. Сондықтан бұл өтініш жоғарыға жетіп, тиісті шешім қабылданатын шығар.
Алматы да – үлкен қала. Ескере жүрейік деген ой ғой біздікі...