Сырдария өзенінде заңсыз су тарту үшін орнатылған бірнеше насос қондырғылары анықталды, деп хабарлайды Aqshamnews.kz ҚР Су ресурстары және ирригация министрлігінің баспасөз қызметіне сілтеме жасап.
«Арал-Сырдария бассейндік инспекциясының мамандары Сырдария өзенінен заңсыз су алған тоғыз тіркелмеген насос қондырғысын анықтады. Аталған фактілер бойынша тоғыз әкімшілік іс қозғалып, құқық бұзушыларға жалпы сомасы шамамен 1,7 миллион теңге көлемінде айыппұл салынды. Жалпы, жыл басынан бері арнайы су пайдалануға рұқсаты жоқ 62 тұлға анықталып, оларға 12,7 миллион теңгеден астам айыппұл салынды», – делінген жексенбі күні таратылған хабарламада.
Бұдан бөлек, жаңа Су кодексінің күшіне енуіне байланысты инспекция мамандары 73 елді мекенде түсіндіру жұмыстарын жүргізген.
«Сондай-ақ, бір заң бұзушылық фактісі Тобыл-Торғай бассейндік инспекциясы тарапынан анықталды. Атап айтқанда, негізгі су құбырында ақау және су есептегіш құралдың істен шыққаны белгілі болды», – деп толықтырды министрлік.
Нәтижесінде су пайдаланушыға айыппұл салынып, анықталған кемшіліктерді жою туралы нұсқама берілді.
«Қазіргі уақытта барлық бассейндік инспекциялар су заңнамасын бұзу деректерін анықтау мақсатында тұрақты түрде мониторинг жүргізіп жатыр. Сонымен қатар, су пайдаланушыларға жаңа Су кодексі, суармалы суды пайдалану ережелері, арнайы су пайдалануға рұқсат рәсімдеу және су үнемдеу технологияларына көшу қажеттігі бойынша түсіндіру жұмыстары да жүргізілуде», – деді ҚР Су ресурстарын реттеу, қорғау және пайдалану комитеті төрағасының орынбасары Темірлан Әбдіқұлов.