ҚР Парламенті Сенатының депутаты Сүйіндік Алдашевтың айтуынша, өткен жылдың қорытындысы бойынша елімізде айтарлықтай энергия тапшылығы сезілуде. Бұл тапшылық шамамен 3 млрд киловатт сағатына жеткен, деп хабарлайды aqshamnews.kz
Электр энергиясының тапшылығын шешу мәселесі күрделі болып отырғандықтан, Мемлекет басшысы бұл шешімді халықтың өзі қабылдауын маңызды деп санап, атом электр станциясын салу мәселесін референдумға шығаруды ұсынды.
– Бұл мәселе әрбір қазақстандықты толғандырып отыр. Сондықтан Мемлекет басшысы халықтың пікірін ескеріп, түпкілікті шешімді халықтың өзі қабылдауы керек деп есептейді. Біз бұл мәселені бүгін мұнайшылармен бірге талқылап отырмыз, – деді Алдашев.
Сондай-ақ, Маңғыстау облысында атом электр станциясының құрылысын қолдау мақсатында арнайы халықтық штаб құрылып, белсенді жұмыс жүргізіп жатқанын айта кету керек. Оның құрамында саяси партиялар, қоғамдық ұйымдар өкілдері, сондай-ақ энергетика саласының тәжірибелі мамандары бар. Штаб мүшелері қазір әртүрлі еңбек ұжымдарымен кездесіп, қоғамды алаңдатқан сауалдарға нақты әрі түсінікті жауаптар беруде. Бұл кездесулер арқылы халықты толғандыратын мәселелерге қатысты ашық ақпарат беру және халықтың атом энергетикасы туралы сауатын арттыру жұмыстары жүргізілуде.