Үкімет отырысында Оқу-ағарту вице-министрі Еділ Оспан су тасқынынан кейін білім беру мекемелеріндегі қалпына келтіру жұмыстарының барысы туралы баяндады.
Ауқымды су 11 мыңнан астам бала оқып жатқан 40 нысанды басты, деп хабарлайды aqshamnews.kz Оқу-ағарту министрлігіне сілтеме жасап.
Ақмола және Солтүстік Қазақстан облыстарында жөндеу жұмыстары толығымен аяқталды.
Ақтөбе облысында 4 772 оқушы оқитын 7 мектеп пен 6 балабақша зардап шекті. 4 нысанда қалпына келтіру жұмыстары аяқталды. Төрт ғимаратта күрделі жөндеу жұмысының 90%-дан астамы орындалды. 5 жаңа нысанның құрылысы басталды. Бұған Үкімет резервінен 6,2 млрд теңге бөлінді. Балаларды жақын маңдағы мектептерге жеткізу жұмысы ұйымдастырылған.
Атырау облысында 4 мыңнан астам бала оқитын 5 балабақша мен 5 мектеп су астында қалды. №8 мектепте жөндеу жұмыстары аяқталды, ағымдағы жөндеу жұмыстары 6 нысанда 70%-дан 80%-ға дейін дайындықпен жүргізіліп жатыр. Сондай-ақ жөндеу жұмыстарын аяқтау және 280 орындық балабақша мен жатақханасы бар «Білім-инновация» лицейін салу үшін Үкімет резервінен 7,7 млрд теңге бөлу жоспарлануда. Құрылысты аяқтау 2025 жылға жоспарланған. Оқушыларды оқыту басқа мектептерде ұйымдастырылған.
Батыс Қазақстан облысында қалпына келтіру жұмыстары 3 нысанда аяқталды, ал Қостанай облысында Үкімет резервтері есебінен 897 млн теңге көлемінде 60 орындық жаңа мектеп құрылысы басталды.
«Зардап шеккен объектілерді қалпына келтіру процесі, жөндеу жұмыстарын уақтылы аяқтау және оқу процесін ұйымдастыру Министрліктің тұрақты бақылауында», — деп түйіндеді Еділ Оспан.