Бұл туралы Үкімет отырысында өңір әкімі Марат Ахметжанов баяндады. Оның айтуынша, аталған іс-шаралар аясында халықтың ұсыныстары белсенді түрде ескерілуде, бұл жұмыстың тиімділігін арттырады.
Қоянды, Талапкер, Қараөткел сияқты елорданың іргесіндегі ауылдарда еріген суды бұру үшін айналма каналдардың құрылысы жүзеге асырылуда. Есіл және Нұра өзендерінің жағалауын нығайту және кеңейту жұмыстары аяқталуда, Атбасар ауданындағы Жабай өзенінің түбін тереңдету жұмысы жүргізілуде, мұндай жұмыс Көкшетаудағы Қылшақты өзенінде жүзеге асырылуда.
Облыс орталығында ұзындығы 3 км қорғаныс білігі құрылысы пайдалануға берілді. Сонымен қатар «Мырза-Көлсар» бөгетін нығайту жұмыстары жүргізілуде. Бұланды ауданындағы бөгетті күрделі жөндеу, Шортанды және Астрахан аудандарындағы бөгеттерді нығайту, Аршалы аудандарының Анар стансасындағы бөгетті қайта жаңарту жалғасуда.
Сондай-ақ Атбасарда қорғаныс білігінің шлюздерін орнату жүргізілуде, бұл тасқын сулардың қауіпсіз өтуін қамтамасыз етуге және 400-ге жуық үйді су басу қаупін азайтуға мүмкіндік береді.