Әл-Фараби атындағы Қазақ Ұлттық университеті Философия және саясаттану факультетінде Дінтану мамандығының 1 курс студенттеріне арналған «Сен халқыңның жүрегіндесің, жауынгер!» атты тәрбие сағаты өтті. 15 ақпан – Ауған жерінен кеңес әскерлерінің шығарылған күніне орай ұйымдастырылған болатын. Шараның мақсаты – ауған соғысы ардагерлеріне құрмет көрсету, жат жерде көз жұмған жерлес азаматтарды еске алу және жастарға патриоттық тәрбие беру. Шараға жалындаған жастық шағын оқ пен от арасында өткізіп, елге аман-сау оралып, туған жерімен қауышқан интернационалист-жауынгерлер, атап айтқанда «Абырой» Ауған соғысы ардагерлері одағының төрағасы Дауылбек Әли Нариманұлы және оның бірқатар жауынгер-ардагерлер арнайы келді. Дінтану және мәдениеттану кафедрасының профессоры Қарлығаш Борбасова жиында өзінің алғысөзін айтып, қазіргі таңда студенттер үшін ауған соғысы ардагерлерінің естелік әңгімелерін тыңдау өнегелі тәрбие деп атап өтті.
Ауған соғысының ардагер жауынгерлері студенттерге туған елін сүю, құрметтеуге баулитын тағлымды ақыл-кеңестерін айтты:
«Біз барлығымыз өз отанымыздың патриоты болуымыз керек. Өкінішке орай, біздің қоғамда мемлекетіміз алдындағы әскери міндеттерін атқарудан қашады. Бұл дұрыс емес. Ұлтарақтай жерімізді ата-бабаларымыз найзаның ұшымен біздер үшін аманат етіп сақтап қалды. Сондықтан отан алдындағы борышты өтеуге міндеттіміз!», – деді.
Ашық сабақ барысында Дінтану мамандығының 1 курс студенттері ауған соғысында жүрек тебірентерлік ерлік көрсеткені үшін алғыстарын білдірді.
