Солтүстік Қазақстан облысында жоғары жылдамдықпен келе жатқан жеңіл көлік аударылып, жас жігіт оқиға орнында көз жұмды, деп хабарлайды Aqshamnews.kz тілшісі.
Қайғылы жағдай 28 қаңтарда кешкі уақытта Тайынша – Чкалово тасжолында, Мироновка ауылының маңында тіркелген. Алдын ала мәліметке сәйкес, Toyota Camry автокөлігі Донецкое ауылынан Тайынша бағытына қарай қозғалған. Елді мекенге жақындағанда жүргізуші көлікті басқара алмай, жол жиегіне шығып кетіп, бірнеше рет аударылған.
Көлік ішінде 19 жастағы жүргізуші мен екі жолаушы болған. Ауыр соққы салдарынан жүргізуші жедел жәрдем жеткенше қайтыс болды. Ал жолаушылар жеңіл жарақат алып, медициналық көмек көрсетілгеннен кейін үйлеріне жіберілген.
Аталған дерек бойынша Солтүстік Қазақстан облыстық Полиция департаменті сотқа дейінгі тергеу жұмыстарын бастады. Мамандар апатқа жоғары жылдамдық пен жол жағдайы себеп болуы мүмкін екенін айтады. Қажетті сараптамалар тағайындалған.
Құқық қорғау органдары жүргізушілерді қысқы кезеңде жол қозғалысы ережелерін қатаң сақтауға және жылдамдықты асырмауға шақырады.