Солтүстік Қазақстан облысында Астана – Петропавл тасжолында үш көліктің қатысуымен жол апаты тіркелді, деп хабарлайды Aqshamnews.kz тілшісі.
Оқиға 14 желтоқсанда таңғы сағат 06:00-де Чапай мен Астраханка ауылдарының арасында болған. Алдын ала мәлімет бойынша, Volkswagen Passat көлігі алдымен бір «Газельге» соғылып, соққыдан аударылып кеткен. Бұдан кейін жеңіл көлік артынан келе жатқан екінші «Газельмен» де соқтығысқан.
Жол апаты салдарынан 32 жастағы Volkswagen жүргізушісі ауыр жарақат алып, аудандық орталық ауруханаға жеткізілді. Ал «Газель» жүргізушілері зардап шекпеген. Көліктердің салондарында жолаушылар болмаған.
Полиция мәліметінше, оқиға бойынша материал жиналып, апаттың барлық мән-жайын анықтау үшін тексеру жүргізіліп жатыр.