Солтүстік Қазақстан облысында төрт адам дөнерден уланып қалды, деп хабарлайды Aqshamnews.kz тілшісі.
Оқиға Мағжан Жұмабаев ауданындағы Булаево қаласында өтіп жатқан “Жастар-2025” облыстық спартакиадасы кезінде болды. Облыстық санитариялық-эпидемиологиялық бақылау департаментінің мәліметінше, зардап шеккендердің үшеуі – бала, біреуі – ересек. Алдын ала дерек бойынша, олардың барлығы 8 тамызда ауылдық стадион аумағындағы сауда нүктесінен дөнер жеген.
Мағжан Жұмабаев аудандық санитариялық-эпидемиологиялық бақылау басқармасы эпидемиологиялық тексеріс бастап, барлық қажетті сынамалар алынды.
Облыстық денсаулық сақтау басқармасының хабарлауынша, уланғандардың барлығы Петропавлдағы инфекциялық ауруханаға жатқызылған.
“Барлық науқастың жағдайы тұрақты, орташа ауырлықта, оң динамика байқалады”, – делінген ведомство хабарламасында.
Айта кетейік, бұған дейін Павлодарда қыз ұзату кезінде жаппай улану дерегі тіркелген болатын. Сол кезде мейрамхана иесі санитариялық талаптарды бұзып, рұқсатсыз жұмыс істегені анықталған.