8 наурыз – Халықаралық әйелдер күні қарсаңында Туризм және спорт министрлігі спортшылардың аналарын шуақты мерекемен құттықтады.
Ведомство басшысы Ермек Маржықпаев ел абыройын әлемдік аренада лайықты қорғап жүрген азаматтарды тәрбиелегені үшін алғысын білдірді, деп хабарлайды аlmaty-akshamy.kz.
«Әрбір адамның өмірінде ананың орны бөлек. Спортшылар да анаға арқа сүйейді. Балаларын жаттығуға да апаратын, рухани қолдау көрсететін де аналар. Сондықтан спортшының анасы болу – үлкен еңбек және мамандық деп те айтуға болады. Сіздердің бала тәрбиесіндегі рөліңізді сөзбен жеткізу қиын және сіздер де спортшылар сияқты кез келген құрмет пен марапатқа лайықсыздар. Өйткені балаларыңыз биік шыңды бағындыру үшін көп нәрсені құрбан еттіңіздер, дегенмен, соның өтеуі ретіде бүгінде осындай керемет мақтаныш пен қуанышқа бөленіп отырсыздар. Ана – кез келген спортшының ең бірінші жанкүйері, ең жақын досы, адал тәлімгері және, әрине, ең қымбат адамы. Қамқорлық пен тәрбиенің, балаңыздың қабілетіне деген сенімнің арқасында сіздер нағыз чемпиондарды өсіре алдыңыздар. Баршаңызды көктемнің осы бір шуақты мерекесі – Халықаралық әйелдер күнімен шын жүректен құттықтаймын!», - деді Ермек Маржықпаев.
Кездесу барысында Туризм және спорт министрі Мемлекет басшысы Қ.Тоқаевтың шахматтан Халықаралық Гроссмейстер Сәдуақасова Динараны құттықтау хатын анасы Өтешова Орал Махметқызына табыстады. Сонымен қатар, іс-шараға қатысқан құрметті меймандарға алғыс хат пен естелік сыйлық табысталды. Өз кезегінде, аналар ризашылығын білдіріп, еліміздегі барша әйел қауымын мерекемен құттықтады. Сондай-ақ спортшыларымыз халықаралық байрақты бәсекелердегі өнерімен тек өз ата-аналарын ғана емес, еліміздің барша жанкүйерін қуантуға тілектес екендігін жеткізді.
