Биылғы күзгі әскерге шақырту науқанының аясында Алматыдан Отан алдындағы борышын өтеуге 17 спортшы аттанды. Олардың арасында халықаралық дәрежедегі спорт шеберлері де бар. Спорттағы жетістіктеріне қарамастан, олар бірден әскери борышын өтеу туралы шешім қабылдап, өздерінің азаматтық парыздарын орындауға дайын екендіктерін көрсетті.
Мұндай жас сарбаздардың қатарында Виктор Друзин мен Дінмұхамед Омаров бар. Виктор – синхронды жүзуден халықаралық дәрежедегі спорт шебері, ал Дінмұхамед – грек-рим күресінен спорт шебері. Бұл жастар спортта биік шыңдарды бағындырып қана қоймай, өз үлгісімен шынайы патриотизм мен азаматтық борышқа адалдықтың жарқын мысалын көрсетіп отыр.
Виктор Друзин – Қазақстан чемпионатының жеңімпазы және Канаданың әлем кубогы кезеңінің иегері. Сонымен қатар ол Қытай, Париж және Будапешттегі әлем кубогы кезеңдерінде жүлделі орындарға ие болған. Спорттық жетістіктерімен ел мақтанышына айналған Виктор әскери қызметті ер азамат үшін маңызды өмірлік кезең деп санайды.
Дінмұхамед Омаров – грек-рим күресінен Қазақстан чемпионы және халықаралық турнирлердің жеңімпазы. Биыл Испанияда өткен халықаралық турнирде топ жарып, өзінің жоғары деңгейдегі дайындығын дәлелдеді. Дінмұхамед әскери қызметті өз отбасының дәстүрі ретінде ерекше құрметтейді. Оның туған інісі Теміртауда әскери борышын өтеп жатыр, ал әкесі де кезінде Отан қорғау сапында болған.
– Ер азамат әскери білім мен дағдыға ие болуы керек. Бұл әр қазақ жігітінің қалыпты әрі маңызды кезеңі, – дейді Дінмұхамед.
Алматы әрдайым жас спортшылардың патриоттық сезімін көрсететін жарқын үлгі болып келеді. 2016 жылы Рио-де-Жанейро Олимпиадасының екі дүркін чемпиондары – ауыр атлет Ниджат Рахимов пен жүзуші Дмитрий Баландин әскер қатарына шақырылған болатын. Ал 2023 жылы бокстан әлем чемпионы Санжар Тәшкенбай да әскери борышын өтеп, болашақ сарбаздарға үлгі болды.
Бұл мысалдар жаңа буын сарбаздарын шабыттандырып, олардың патриоттық сезімін нығайта түседі.
Еске салайық, күзгі әскерге шақыру науқаны желтоқсан айының соңына дейін жалғасады. Бұл науқан барысында Алматыдан 18-27 жас аралығындағы, денсаулығы жарамды, кейінге шегеру құқығы жоқ мыңнан астам жас жігіт әскери борышын өтеуге аттанады.