Алматы қаласы Қоғамдық даму басқармасының «Бас бостандығынан айыру орындарынан шыққан адамдарды әлеуметтік бейімдеу» жобасы аясында «Social project» қоғамдық қорының өкілдері сотты болған жастармен жүздесті.
Алматы қаласы бойынша ҚАЖД №11 мекемесінде ұйымдастырылған бас бостандығынан айырылған жазасын өтеуші жасөпірімдермен кездесуде қалалық «Атамекен» ұлттық кәсіпкерлер палатасының өкілі Айдос Қалжанов жастарға заңдық, құқықтық кеңестер берді. Нақтырақ айтсақ, жазасын өтеуші жасөпірімдерге босатылғаннан кейін көмек көрсетілетіні, ешқандай шеттетілмей, жұмыспен қамтылатыны туралы да тарқатып айтты.
– Біздің мақсат – бас бостандығынан айырылып, жазасын өтеп жатқан жеткіншектерге ертеңгі күні бостандыққа шыққаннан кейін тығырыққа тіреліп, қоғамнан алшақтап қалмауы үшін не істеу керектігін, алдағы жақсы күндерден үміт үзбеулерін түсіндіру. Жаза басқандарға «сотты болу – соңғы үкім емес» екенін жеткізіп, осынау өмірден өз орнын таба алатынына сендіріп, ішкі мотивациясын көтергіміз келеді, – дейді «Social project» қоғамдық қордының директоры, жоба жетекшісі Бейбіт Нәлібаев.