Оқиға Ғабит Мүсірепов ауданының аумағында орын алды. Есіл өзенінің үстіндегі Нежинка мен Бірлік ауылдарын байланыстыратын көпір астық тасымалдап келе жатқан Shacman жүк көлігінің салмағын көтере алмай, опырылды. Қазір ауыл тұрғындары үшін қысқа жол қатынасы үзілді, деп хабарлайды aqshamnews.kz
«18 желтоқсан күні 56 жастағы жүргізуші рульді басқара алмай, көлігі өзенге аударылып кетті», – деп мәлімдеді СҚО полиция департаментінің баспасөз қызметі.
Жергілікті тұрғындардың айтуынша, көпір шамамен 50 жыл бұрын салынған.
«Ол кезде ең ауыр көліктер КамАЗ болатын, олардың жалпы салмағы жүкпен бірге 16 тоннаға жететін. Тіпті шамадан тыс жүктемемен 25 тонна болғанның өзінде, қазіргі Shacman жүк көлігінің жалпы салмағы 40 тонна, ал шамадан тыс жүктелгенде 50 тоннаға дейін жетеді», – деп жазды әлеуметтік желідегі пікірлерде.
Оқиға салдарынан ешкім зардап шеккен жоқ.