Алматы дәрігерлері 70 жасқа дейінгі барлық қала тұрғындарын скрингингтік тексеруден өтуге шақырады.
Өңірлік коммуникациялар қызметінің алаңында өткен брифингте Алматы қаласындағы №21 қалалық емхананың профилактика және әлеуметтік-психологиялық көмек көрсету бөлімінің меңгерушісі Қонай Бесбаевтың айтуынша, бұл скринингтік тексеру көптеген ауруларды ертерек анықтауға, дер кезінде емдеуді тағайындауға және өмірді сақтауға мүмкіндік береді, деп хабарлайды Аlmaty-akshamy.kz
Скрининг нақты аурулар бойынша және екі жас санаты бойынша жүргізіледі. Балалар 0-ден 18 жасқа дейін, ал ересектер 30-дан 70 жасқа дейін скринингтен өтеді.
«Балалар кәмелетке толғанға дейін жыл сайын профилактикалық тексеруден өтеді. Мектепке дейінгі мекемелердің тәрбиеленушілері, мектеп оқушылары, орта арнаулы оқу орындарының студенттері және 18 жасқа толмаған студенттер білім беру ұйымдарында жылжымалы топ барған кезде тексеріледі. Мектепке дейінгі мекемелерге бармайтын балаларды тексеру емханада немесе отбасылық денсаулық орталығында жүргізіледі», - деді спикер.
Дәрігер ешқандай белгілер болмаған жағдайда да тексеру жүргізілетінін айтты. Бұл адамның денсаулығына қатысты сенімді болу үшін жасалады. Ол сондай-ақ скрининг процедурасы туралы егжей-тегжейлі түсіндірді.
«Скринингтен өту үшін, тұрғылықты жері немесе тіркелген жері бойынша емханаға хабарласу қажет. Ол үшін әрбір алғашқы медициналық-санитарлық көмек қызметінде скринингтік кабинеттер бар. Өзіңізбен бірге жеке куәлік болуы керек. Науқас мінез-құлық факторларын, гипертонияны, жүректің ишемиялық ауруын, қант диабетін және глаукоманы ерте анықтау үшін скринингтік кабинетте тексерілгеннен кейін онкопатологияға тексеріледі, егер ол жасына байланысты скринингтің осы түріне жататын болса, жасалады», - деп жалғастырды Қ.Бесбаев.
Сонымен қатар, скринингтік зерттеудің соңында дәрігер мамандардың қорытындысын және зертханалық диагностикалық зерттеулерді ескере отырып, динамикалық бақылау топтарын анықтайды.
Брифинг соңында спикер аудандық бөлімдер мен дәрігерлер барлық профилактикалық тексерулерді бір жылға жоспарлап отырғанын жеткізді.
«Мәселен, қазір қараша-желтоқсан айы келіп қалды және біз қазірдің өзінде 2023 жылы профилактикалық тексеруден өтуі тиіс адамдарды жоспарлап жатырмыз. Тиісінше, біз осы адамдардың барлығын хабардар етеміз, яғни біз қоңырау шалып, SMS жібереміз. Егер сізге ешкім қоңырау шалып, хабардар етпесе, сіз жай ғана тіркелген емханаға барып, сол жерде тексеріле аласыз», - деп түйіндеді спикер.
Айта кетейік, көрсетілімдер толықтай тегін. Профилактикалық тексерулерді қаржыландыру МӘМС есебінен жүзеге асырылады, сондықтан скринингтен өту үшін сақтандыру мәртебесі болуы қажет.