Үкімет отырысында ҚР Цифрлық даму, инновациялар және аэроғарыш өнеркәсібі министрі Жаслан Мәдиев Қазақстанның Цифрлық кодексі Мемлекет басшысы белгілеген мерзімде қабылданатынын мәлімдеді, - деп хабарлайды Aqshamnews.kz.
«Қазір кодекс жобасын Парламент Мәжілісі қарап жатыр. Оны пысықтау Мәжіліс жанынан құрылған арнайы құзыреттер орталығы арқылы жүзеге асырылады. Жоба қазақ, орыс және ағылшын тілдерінде GitHub платформасында жарияланады», - деді министр.
Сонымен қатар Жаслан Мәдиев «Alatau City» цифрлық қаласына қатысты жобалар жайлы баяндады.
«Бұл қаланы құру кезінде жасанды интеллект технологиялары қолданылады, Smart City архитектурасы әзірленеді. Сондай-ақ экожүйеде криптовалюталарды қолдануға қажетті нормативтік-құқықтық актілер дайындалады», - деді министр.
Айта кетейік, Мемлекет басшысы Қасым-Жомарт Тоқаев өз Жолдауында Қазақстанды үш жыл ішінде толыққанды цифрлық державаға айналдыру міндетін қойған болатын. Бұл бағыттағы алдағы қадамдар мен мақсаттарға еліміздің қаншалықты қол жеткізе алатыны туралы сарапшылар пікірі Kazinform агенттігі арқылы жарияланған еді.