Шымкент қаласындағы медициналық мекемелердің бірінде мерзімді әскери қызметтегі сарбаз кенеттен көз жұмды, деп хабарлайды Aqshamnews.kz тілшісі.
Ұлттық ұланның баспасөз қызметінің мәліметінше, жас жігіттің жүрегі тоқтап қалған. Марқұм Жамбыл облысы, Тараз қаласынан әскер қатарына шақырылған. Қызмет барысында ол денсаулығына байланысты бірнеше мәрте дәрігерлер көмегіне жүгінген.
Сарбаз Шымкент қаласындағы ауруханаларда мамандардың тұрақты бақылауында болып, қажетті медициналық тексерулерден өткен. Алайда 2026 жылғы 6 қаңтарда оның жүрегі кенеттен тоқтап, дәрігерлер жансақтау шараларын жүргізгенімен, өмірін сақтап қалу мүмкін болмаған.
Алдын ала мәліметтерге сәйкес, өлімнің ықтимал себебі — «жіті лейкоз» (қан обыры). Аурудың күрт асқынуы ағзаның жалпы жағдайына кері әсер еткен.
Аталған дерек бойынша Әскери-тергеу басқармасы қылмыстық іс қозғады. Қазіргі таңда оқиғаның мән-жайын анықтау үшін тергеу амалдары жүргізіліп жатыр.