Шығыс Қазақстан облысы Зайсан ауданында жаңа әуежайдың құрылысын салу үшін жобалық құжаттама әзірлеу басталды, деп хабарлайды aqshamnews.kz.
Жаңа әуежай Сатпай ауылында, Зайсан қаласынан 28 шақырым қашықтықта орналасады. Бұл туралы Зайсан аудандық әкімінің орынбасары Нұрғайни Қабидолдина өңірлік коммуникациялар қызметінде өткен брифингте мәлімдеді.
— Әуежай құрылысын салу аймақтың туризмін дамытуға және жергілікті тұрғындардың өмір сапасын жақсартуға жаңа мүмкіндіктер ашады. Біз тек әуежай салумен ғана шектелмей, сонымен қатар заманауи инфрақұрылымды құруды жоспарлап отырмыз. Бұл инфрақұрылымға жаңа жолдар, логистикалық қоймалар және басқа да нысандар кіреді. Олар көлік қолжетімділігін арттыруға ықпал етеді, — деп атап өтті Нұрғайни Қабидолдина.
Сонымен қатар, ауданның туристік әлеуетін дамытуға «Омск — Майкапшагай» автожолын қайта жаңарту да үлкен әсер ететін болады. Жұмыстар «ҚазАвтоЖол» ұлттық компаниясының тапсырысы бойынша жүргізілуде, ал жобаның жалпы құны 17,4 миллиард теңгені құрайды.
Бұл ірі инфрақұрылымдық жобалардың іске қосылуы аймақтың экономикалық әлеуетін арттыруға, Шығыс Қазақстандағы көлік логистикасын жақсартуға және жергілікті бизнестің дамуына оң әсерін тигізеді деп күтілуде.