Шығыс Қазақстан облысында TikTok үшін "әсерлі фото" түсірмек болған әйел полицейлердің қызметтік көлігінің капотына шығып, әкімшілік жазаға тартылды, деп хабарлайды Аqshamnews.kz тілшісі өңірлік сотқа сілтеме жасап.
Оқиға 2025 жылғы 22 қыркүйекте шамамен сағат 20:00-де Алтай ауданындағы көлік жуу бекетінде болған. Әйел аудандық полиция бөлімінің қызметтік автокөлігінің капотына мініп, суретке түсіп, оны TikTok-та жариялаған. Сот бұл әрекетті билік өкілдеріне құрметсіздік танытып, қоғамдық тәртіпті бұзу деп бағалап, ҚР ӘҚБтК-нің 434-бабының 1-бөлігі («Ұсақ бұзақылық») бойынша жауапкершілікке тартты.
Сотта ол өз кінәсін мойындады. Екі кәмелетке толмаған баланы тәрбиелеп отырған, жұмыссыз екені ескеріліп, әйелге әкімшілік қамау қолданылмай, 20 АЕК көлемінде айыппұл салынды. 30 пайыздық жеңілдікті есептегенде төленетін сома 55 048 теңгені құрады. Сот қаулысы заңды күшіне енді.