Әзірге қаншаға көтерілетіні белгісіз.
Алматыда 1 шілдеден бастап су, жарық пен жылуға тариф қымбаттайды, деп хабарлайды Almaty-akshamy.kz
Бұл туралы бүгін Табиғи монополияларды реттеу комитеті Алматы қаласы бойынша департаментінің басшысы мәлімдеді.
«Әзірге қаншаға көтерілетіні белгісіз. Белгілісі ірі монополистер өз ұсыныстарын беріп жатқанға ұқсайды. Мәселен, электр жарығын 40 пайызға, жылу мен ыстық судың бағасын 43 пайызға, ал, суық суды 44 пайызға көтеру ұсынылыпты. Бұл "Тарифті инвестицияға алмастыру" қағидасы бойынша қолға алынған шаралар. Тарифтен түскен қаражат жөндеу жұмыстарына кетеді», деді Табиғи монополияларды реттеу комитетінің өкілі.
Айта кету керек, қазіргі уақытта Алматы бойынша "Алатау жарық компаниясының" желілері 92,67 пайызға, жылу желілері 59,2 процентке, ал, сумен қамтамасыз ететін желілер 56,4 пайызға тозған. Тариф бағасы өскен соң, апаттар азайып, коммуналдық қызмет көрсету сапасы артады деп отыр жауаптылар. Оған қоса, 2029 жылға қарай желілер 15%-ға жаңартылады деп уәде етті.
"Тариф бағасы бірден өсіп кетпейді. Нақты қанша көтерілгенін монополистер 5 күн бұрын хабарлайды. Яғни, 25 маусымнан бастап белгілі болады. Барлық өтініштер тарифтерді қалыптастыру ережелеріне сәйкес қаралатынын айтқым келеді. Ол үшін мәслихат депутаттарынан бастап, қоғам белсенділері, сарапшылардың қатысуымен тыңдалым болады", - деді Табиғи монополияларды реттеу комитеті Алматы қаласы бойынша департаментінің басшысы Әсел Бөденеева.