Мемлекет басшысы Қазақстан халқы Ассамблеясының ХХХІV сессиясында сөйлеген сөзінде шетелдік үкіметтік емес ұйымдардың кейбір әрекеттері әшкереленгенін атап өтті. Олардың түпкі мақсаты – Қазақстанның тұрақтылығына қол сұғу екенін жеткізді.
"Олардың арам ниеті, ашкөздігі мен Қазақстанға жаны ашымайтыны анық көрінді", – деді Президент.
Сонымен қатар, белгілі қазақстандық грант алушылардың да көлеңкелі әрекеттері әшкере болғаны айтылды. Бұл жайт қоғам мен биліктің шынайы сергек болуы қажеттігін көрсетеді.
Қасым-Жомарт Тоқаев Қазақстанның ішкі мәселелерін тек ұлттық мүдде мен отандық заңнама шеңберінде шешетінін нақты айтты.
"Қазақстанда проблема жоқ демейміз. Әрине, басқа елдердегідей бізде де түйткілдер бар. Бірақ біз оны әлдекімдердің әдістемесімен емес, өзіміздің ұлттық мүддеміз бен заңнама аясында шешеміз", – деді ол.