Шегрен – иммундық жүйе ағзаның ылғал бөлетін бездеріне (көз жасы және сілекей бездері) шабуыл жасайтын созылмалы ауру, – деп хабарлайды aqshamnews.kz тілшісі.
Соның салдарынан көз, ауыз және басқа да шырышты қабықтар құрғап, табиғи қорғанысын жоғалтады. Аурудың нақты себебі белгісіз. Оның дамуына тұқым қуалаушылық, гормондық ерекшеліктер (әйелдерде жиі кездеседі) және бұрын жұқтырылған вирустық инфекциялар әсер етуі мүмкін. Шегрен жұқпалы емес және тұрмыстық қатынас арқылы берілмейді.
Негізгі белгілері: көзде «құм тұрғандай» немесе бөгде зат бардай сезім; көздің ашуы, қызаруы, жарыққа және желге сезімталдықтың артуы; ауыздың құрғауы, ұзақ сөйлегенде қиындықтың болуы; тілдің жылтырланып немесе жарылып кетуі; тістердің жиі бұзылуы (кариес); тез шаршау, әлсіздік; буындар мен бұлшықеттердің ауыруы; терінің және мұрын жолдарының құрғауы.
Кардиология және ішкі аурулар ғылыми-зерттеу институтының №2 терапия бөлімшесінің меңгерушісі, ревматолог дәрігер Майса Қалықованың айтуынша, күнделікті күтімнің негізгі мақсаты – жетіспейтін ылғалды толықтыру, көзді зақымданудан, ал тістерді бұзылудан қорғау.
Құрамында консерванттары жоқ ылғалдандыратын көз тамшыларын (гиалурон қышқылы негізіндегі) қолданыңыз. Тамшыларды күніне 4–6 рет тұрақты түрде тамызыңыз. Ұйықтар алдында төменгі қабаққа арнайы көзге арналған гель немесе жақпа жағыңыз. Далаға шыққанда күннен қорғайтын немесе қарапайым көзілдірік тағыңыз – олар көзді жел мен шаңнан қорғайды. Кондиционер, желдеткіш немесе феннің тікелей ауа ағынынан сақтаныңыз. Компьютер немесе телефон экраны алдында ұзақ отырмаңыз: әр 20 минут сайын үзіліс жасап, жиі жыпылықтаңыз.
Сілекей – бактериялар мен қышқылдарға қарсы табиғи қорғаныс. Ол жеткіліксіз болғанда тістер өте тез бұзылады. Өзіңізбен бірге әрдайым су алып жүріп, күні бойы аз-аздан ішіңіз. Әр тамақтан кейін жұмсақ тіс щеткасымен және құрамында фторы көп тіс пастасымен тісіңізді тазалаңыз. Тіс жібін және құрамында спирті жоқ ауыз шайғыштарды қолданыңыз. Стоматологқа әр 3–4 ай сайын қаралып тұрыңыз.
Жатын бөлмеге және жұмыс бөлмесіне ауа ылғалдандырғыш орнатыңыз. Өте ыстық душ немесе ванна қабылдамаңыз. Жуынғаннан кейін дымқыл теріге бірден крем жағыңыз. Мұрынды теңіз суы қосылған спрейлермен шайыңыз немесе қабыршақ пайда болғанда майлы мұрын тамшыларын қолданыңыз.
* Тағамды жұмсартып жеу: тұздық, сорпа, зәйтүн майын қосу,
* Бөлме температурасындағы таза суды аз мөлшермен жиі ішу,
* Омега-3 бай тағамдарды тұтыну: балық, зығыр майы,
* Қорғаныш көзілдірігімен таза ауада серуендеу керек.
* Құрғақ және қатты тағамдардан (кепкен нан, чипсы, печенье);
* Ащы, қышқыл және тұзды тағамдардан;
* Тәтті тағамдар мен газдалған сусындардан;
* Алкоголь, кофе және темекіні шектеу немесе бас тарту керек
Шегрен ауруын ревматолог дәрігер емдейді.
Маңызды: ревматолог тағайындаған дәрі-дәрмектерді өз бетіңізше тоқтатпаңыз және дозасын өзгертпеңіз.
Міндетті түрде дәрігерге немесе ревматологқа хабарласыңыз, егер:
* Ұрт немесе жақ асты аймағында бірнеше күн бойы кетпейтін тығыз ісіну пайда болса;
* Көру күрт нашарласа, көз қатты ауырса немесе іріңді бөлінді шықса;
* Ауызда ақ өңез немесе еріннің бұрыштарында ауырсынатын жарықтар пайда болса;
* Дене қызуы көтерілсе, түнде қатты терлесе немесе салмақ күрт азайса;
* Аяқта тығыз көгерулер, бөртпе немесе аяқ-қолдың ұюы байқалса.