Қостанайда Ауыл шаруашылығы министрлігінің агроинспекторы пара алғаны үшін сотталды
Қостанайда Ауыл шаруашылығы министрлігі жанындағы агроөнеркәсіптік кешендегі мемлекеттік инспекция комитетінің төрағасы Дархан Әбдікәрімовке сот үкімі шықты. Ол бірнеше миллион теңге көлемінде пара алғаны үшін айыпталған, деп хабарлайды aqshamnews.kz
Бұл оқиға биылғы жазда басталды. Маусым айында мемлекеттік инспекция комитетінің төрағасы болып тағайындалған Дархан Әбдікәрімов лауазымын пайдаланып, заңсыз әрекеттерге барған. Шенеунік бір жауапкершілігі шектеулі серіктестік (сотта компанияның атауы көрсетілмеді) директорымен шегірткеге қарсы пестицидтер жеткізу бойынша келісімшартқа қол қою үшін пара алуға келіскен.
Маусым айында Әбдікәрімов делдал арқылы параның алғашқы бөлігін – 2 миллион теңгені алған. Екі айдан кейін серіктестер қайта кездесіп, комитет басшысы қалған 2,4 миллион теңгені алған.
Бұл қаражат пестицидтерді 78 миллион теңгеге сатып алу келісімшартына қол қойғаны үшін берілген алғыс ретінде қарастырылған.
Сот Әбдікәрімовті 3,5 жылға бас бостандығынан айыру туралы үкім шығарды. Ал ЖШС директоры орташа қауіпсіздік деңгейіндегі колонияда 3 жыл жазасын өтейтін болды.