Тау етегіндегі балалардың думанды мекені- Оқушылар Сарайында ата-анасының қамқорлығынсыз қалған 170 бала таңғаджайыпқа толы шырша мерекесінің қонағы болды. Дәстүрлі жаңа жылдық шырша мерекесін биыл Алматы қаласы әкімдігі, Қазақстан Республикасы Сыбайлас жемқорлыққа қарсы іс-қимыл Агенттігінің Алматы қаласы бойынша Департаменті, "IMEI" халықаралық ақыл-ой білім беру орталығымен бірлесіп ұйымдастырып отыр.
Алдымен балақайларды түрлі ертегі кейіпкерлері қарсы алып, үлкен залға бастады. Осынау сәтте, нағыз керемет басталды! Оқушылар сарайының салтанат залы нағыз қуаныш пен адам сенбес сиқыр әлеміне айналғандай.
Ертегі кейіпкерлерінің барлығы осында жиналған. Ортадағы алып шырша маңына жиналған балалар да осынау ғажайыпқа сенер-сенбесін білмей біраз тұрып, қызықты ойынға кірісіп кетті. Өйткені, оларды қызықты интерактивтер, көңілді ойындар, әдемі би мен түрлі сыйлықтар күтіп тұрды. Шырша қонақтарын қалалық Білім басқармасы басшысының орынбасары Бибігүл Төлепбергенқызы құттықтап, табысқа жетуге шақырды.
Келесі сәтте балалар Оқушылар сарайының шығармашылық ұжымы ұсынған концерттік бағдарламаны тамашалап, түрлі ертегі кейіпкерлерімен кездесті.
-Жаңа жыл балалардың ең жақсы көретін мерекесі. Өйткені, бұл мереке шаттық пен қуанышқа толы. Сондықтан балалар оны жыл бойы тосады. Биыл осынау сиқырлы мерекені Оқушылар сарайының ұжымы ұйымдастырып, оған бірнеше серіктесіміз қолдау көрсетіп отыр. Қайырымдылық танытып, көмек көрсеткен серіктестеріміз "IMEI" халықаралық ақыл-ой білім беру орталығына, Оқушылар сарайының шығармашылық ұжымына, Қазақстан Республикасы Сыбайлас жемқорлыққа қарсы іс-қимыл Агенттігінің Алматы қаласы бойынша Департаментіне және Қазақстанның автомобиль тасымалдаушылары мен экспедиторлар Одағына шын жүректен алғысымызды білдіреміз Осындай жүрегі жомарт жандардың арқасында бұл күн балалар үшін шын мәнінде ертегі болды. Алдағы 2025 жылы ел Үкіметі балалар үйінде тәрбиеленіп жатқан балаларды патронаттық отбасылардың тәрбиелеп алуы үшін заңды ережелерді жеңілдетуді жоспарлап отыр. Бұл әрине, оң қадам болар еді, -дейді Қоғамдық кеңестің мүшесі, белсенді жас Рафаэль Гасанов.
Шырша мерекесінің соңында серіктестер әрбір балаға тәтті торттарды сыйға тартып, Аяз аталар шығарып салды.