Бүлдіршіндерді осылай алдаған бойжеткен қолға түсті.
Ол 3 күнде 300 мың теңгеге жуық шығын келтірген, деп хабарлайды aqshamnews.kz қалалық полиция департаментінің баспасөз қызметіне сілтеме жасап.
Көппәтерлі үйлердің ауласында жүрген қыз балаларды "шашыңды әдемі етіп өріп беремін" деп алдаған бойжеткен алтын сырғаларын шешіп алып кеткен.
"Үш күн ішінде ол қаланың 4 кішкентай тұрғынынан алаяқтық жолмен қымбат зергерлік бұйымдарды алдап алып, 300 мың теңгеге жуық шығын келтірген", - делінген полицияның хабарламасында.
Әл-Фараби АПБ-ның жедел уәкілдері дереу күдіктіні іздеуге кірісті.
Полицейлер куәгерлерден болған оқиғалар туралы сұрастырып, қылмыс орнына жақын орналасқан бейнебақылау камераларының жазбаларын тексерді.
Қабылданған шаралардың нәтижесінде 20 жастағы қыз қала аумағында ұсталды. Ол ұрлаған бұйымдарын ломбардқа өткізгені анықталды.