Жыл өткен сайын ауылшаруашылықпен айналысатын шаруалардың жұмысы шатқаяқтап барады. Неге? Өткен жылы қаншама шаруа пияз егіп шығынға молынан батты. Қауын-қарбыз егуші диқандар да бірнеше жыл өнімдерін далада қалдырды. Соның салдары ма биыл Қазақстанда бақша дақылдарының егіс алқабы 8,9% - ға азайыпты, деп хабарлайды aqshamnews.kz.
Қазақстан Республикасы Стратегиялық жоспарлау және реформалар агенттігі Ұлттық статистика бюросының (ҰБС) есептеріне сәйкес, биылғы маусымда қарбыз мен қауын 98,1 мың гектар жерге егілген. Салыстырмалы түрде өткен жылы жалпы егіс алқабы 107,6 мың гектар болған. Биылғы жылы қауын-қарбызды егуге шаруа қожалықтары мен жеке кәсіпкерлер көбірек басымдық беріпті. Нәтижесінде егіс алқаптардың 82%-на кәсіпкерлер дән еккен.
Биылғы жылы да қауын-қарбыз егуден Түркістан облысынан ешкім басып оза алмады. Еліміздегі ыстық аймақта қауын-қарбыз алаңы 73,8 мың гектарға жеткен. Бұл ел аумағы бойынша жалпы алаңның 75,2%-ы. Оңтүстік облыстарда қауын өсіретін ортаңқол шаруалар да бар. Бірақ олар бюджеттен көмек болмаған соң құлқы кете бастаған. Жалпы егіс алқабының 17,9 мың гектарына дақыл еккен.
Ұлттық статистика бюросы мәліметтері бойынша, өткен жылы диқандар 2,8 миллион тонна бақша дақылдарын жинаған. Оның 1,4 миллион тоннасы қарбыз. Бұл қиын, құрғақшылық орын алған өткен жылғы жеткен жетістік. Ал 2024 жылы суармалы су жағдайы жақсы жаққа өзгерді. Көктемгі су тасқынынан кейін Шардара сумен жабдықтау қоймасы 90% - ға толды. Демек Түркістан облысының диқандары үшін бұл өте қолайлы жағдай. Тіпті, осындай мүмкіндікті пайдаланып, екінші рет өнім алуға мүмкіндіктері бар. Сондықтан былтырғы көрсеткішті басып озуға ниет білдіруі тиіс. Өткен жылғы көрсеткішті жаңарта алар ма екен. Оны уақыт еншісіне қалдырдық.