Түрксіб ауданының әкімі Бақытжан Ақжаров «Нұршашқан» шағынауданының тұрғындарымен кездесті.
Аудан тұрғындары электрмен қамту, жарықтандыру, жол құрылысы, қоғамдық көлік сынды өзекті мәселелердің шешімін сұрады.
Түрксіб ауданы әкімдігінің баспасөз қызметі хабарлағандай, қазіргі таңда электр қуатын тұрақтандыру мақсатында «Тұздыбастау» қосалқы стансасының құрылысы жүргізіліп жатыр. Сонымен қатар, электр желілерін қайта жаңғырту, 465 жаңа тірек, 8 трансформаторлық және 1 таратушы қосалқы станцияларды орнату жұмыстары жүргізілуде. Бүгінгі күні жобаға сәйкес жалпы жұмыстың 10 пайызы орындалған. Құрылыс-монтаждау жұмыстары жылыту маусымына байланысты тоқтатылған.
Аудан әкімі аталған жобаны жүзеге асыру шағын ауданды электрмен қамту сапасын арттыруға мүмкіндік беретінін және осы жылы электрмен жабдықтау жобалары бойынша жұмыстарды аяқтау жоспарланғанын айтты. Сонымен қатар, ол қазіргі таңда шағынаудан 97 пайызға жарықтандырылғанын және қалған үш көшені жарықтандыру жұмыстары сәуір айының соңына дейін аяқталатынын хабарлады.
Кездесу барысында апаттық жағдайлардың салдарымен күресі үшін қандай жұмыс атқарылып жатқаны да айтылды. Аудан басшысының хабарлауынша, Алматы қаласы Энергетика және сумен жабдықтау басқармасының мердігерлік ұйымы «Нұрай строй» су желілерінде анықталған апаттық-қалпына келтіру жұмыстарын жүргізуде. Төтенше жағдай аясында Тбилисская көшесіндегі кәріз коллекторын қалпына келтіру жұмыстары басталып, аяқталу мерзімі 2023 жылдың мамыр айына жоспарланған. Аталған жұмыс «Нұршашқан» шағынауданын сапалы сумен қамтамасыз етуге мүмкіндік береді.
Айта кеткен жөн, инженерлік желілерді тарту жобасында 13 абонент (Мейірім көшесі) қамтылмаған. Сондықтан аудан әкімдігі Энергетика және сумен жабдықтау басқармасына қамтылмай қалған аумақтарды жобалауға өтінім берді.
Сондай-ақ, Түрксіб ауданының әкімдігі Бердіқожа көшесінде жол құрылысын жүргізу үшін Жер қатынастары басқармасына жерді сатып алу бойынша сұраныс жіберген.
Айта кетерлігі, шағынауданда Жақұт көшесі бойында саябақ пен балалар алаңын абаттандыру мәселесі қарастырылуда. Жобаны іске асыру үшін «Бюджетке қатысу» бағдарламасы аясында аудан әкімдігі Алматы қаласының Жер қатынастары басқармасына жер телімдерін сатып алуға тағы бір сұраныс жіберген.
Аудан әкімінің халықпен кездесуі барысында өткен жылдың желтоқсан айында құрылысы басталған 100 келушіге арналған дәрігерлік амбулаторияның 2023 жылдың маусым айында қолданысқа берілетіні жоспарланып отырғаны айтылды.