Бүгін Alatau-Aqparat медиахолдингіне Түркиядан арнайы шақырылған тәлімгер әрі коуч Айдын Доған кәсіптік-техникалық лицейінің радио және телевизия пәнінің оқытушысы Хуля Акан Челик ханым «Әлеуметтік желілерде жұмысты алға жылжыту құралдары» тақырыбында дәріс оқып, журналистерге шеберлік сабағын өткізді.
Шара барысында Хуля ханым әлеуметтік медиада бренд қалыптастырудың заманауи тәсілдері, контент стратегиясын құру, аудиториямен тиімді байланыс орнату және жарнамалық мүмкіндіктерді дұрыс пайдалану жолдарын жан-жақты түсіндірді. Қатысушылар әлеуметтік желіге қатысты нақты кеңестер алды.
Бұл шеберлік сабағы медиахолдинг қызметкерлерінің кәсіби дағдысын арттыруға және жаңа медиа құралдарын тиімді пайдалануға бағытталды.
Бұдан бұрын Стамбулдағы Айдын Доган Кәсіптік және техникалық Анадолы лицейінің шәкірттері Аqshamnews.kz, Vecher.kz сайттары мен Almaty aqshamy және «Вечерний Алматы» газеттерінде тәжірибеден өтуге екінші рет келген. Медиахолдингіміз бен оқу орны арасындағы серіктестік келісім екі ұжым үшін де жемісті болып тұр.