Қазақстанның бірқатар өңірінде сенбі күні қар мен жаңбыр түріндегі жауын-шашын күтіледі, деп хабарлайды Aqshamnews.kz тілшісі.
«Қазгидромет» мәліметінше, Батыс және Оңтүстік циклондарға байланысты елдің басым бөлігінде қар, бұрқасын, ал батыс пен оңтүстікте күндіз жаңбыр мен қар жауады. Республика бойынша жел күшейіп, тұман мен көктайғақ күтіледі.
Астана қаласында аздап қар жауады, түнде ауа температурасы –20…–22 градусқа дейін төмендейді. Алматыда жауын-шашынсыз, тұман түседі, күндіз +2…+4 градус болады. Шымкентте жаңбыр мен қар аралас жауын-шашын күтіліп, ауа температурасы +7…+9 градусқа дейін көтеріледі.
Синоптиктер сондай-ақ алдағы үш тәулікте елдің шығысы, оңтүстік-шығысы мен оңтүстігіндегі өзендерде су деңгейінің ауытқуы мүмкін екенін ескертті.