Сенбі күні Қазақстанның көп бөлігінде жауын-шашын болмайды. Тек елдің батысында жаңбыр жауып, найзағай ойнап, кей жерлерде нөсер күтіледі, – деп хабарлайды aqshamnews.kz тілшісі.
“Қазгидромет” мәліметінше, антициклон әсерінен республиканың басым аумағында күн ашық болады. Кей өңірлерде тұман түсіп, солтүстікте көктайғақ, ал батыс, оңтүстік, шығыс және орталықта жел күшейеді. Батыс пен оңтүстікте шаңды дауыл болуы мүмкін.
Алматыда жауын-шашынсыз, күндіз ауа температурасы +20…+22 градус болады. Астанада да жауын-шашын күтілмейді, күндіз +12…+14 градус. Шымкентте күн ашық, ауа температурасы +26…+28 градусқа дейін көтеріледі.
Синоптиктер алдағы үш тәулікте күннің жылынуына байланысты жазықтағы өзендерде қардың қарқынды еруі жалғасып, су деңгейі көтерілуі мүмкін екенін ескертті.