Абай облысы бойынша Қаржы мониторингі агенттігінің департаменті облыс прокуратурасының үйлестіруімен және Семей қаласының Мемлекеттік кірістер департаментімен бірлесіп, заңсыз алкоголь өнімдерін өндірген жасырын цехтың жұмысын тоқтатты, – деп хабарлайды aqshamnews.kz тілшісі.
Тергеу мәліметінше, Семей қаласының тұрғыны тиісті лицензиясыз алкоголь өндірген. Заңсыз өнім орынжайлар мен гараждарда спиртті сумен араластыру арқылы дайындалып, кейін танымал брендтердің атауымен шыны бөтелкелерге құйылған. Өнімге заңды сипат беру үшін қолдан жасалған есепке алу-бақылау маркалары пайдаланылған.
Тінту кезінде "Finsky Ice" және "Сибирские морозы" атауымен 12 мыңнан астам бөтелке алкоголь, 8 мыңнан аса бос бөтелке, 10 мың литрден астам спирт құрамды сұйықтық, жалған маркалар, сондай-ақ өндіру және буып-түюге арналған жабдықтар тәркіленді.
Сот санкциясымен цех орналасқан жекеменшік үйге және өнімді тасымалдауға пайдаланылған үш автокөлікке тыйым салынды. Ал ұйымдастырушыға қатысты елден шықпау және тиісті мінез-құлық туралы қолхат түріндегі бұлтартпау шарасы таңдалды.
Қазір тергеу жалғасып жатыр. Қазақстан Республикасы ҚПК-нің 201-бабына сәйкес өзге ақпарат жария етілмейді.
Қаржы мониторингі агенттігі мұндай өнімдерді тұтыну азаматтардың өмірі мен денсаулығына айтарлықтай қауіп төндіретінін ескертті. Ведомствоның мәліметінше, сапасыз алкоголь улануға, ішкі ағзалардың, соның ішінде бауыр мен бүйректің зақымдануына, тіпті өлімге әкелуі мүмкін.