Семейде жоғалып кеткен 7 жастағы Аманғали Бекболат аман-есен табылды, деп хабарлайды Aqshamnews.kz тілшісі.
Абай облыстық полиция департаментінің мәліметінше, 2018 жылы туған бала 14 маусым күні кешкісін үйінен шығып кетіп, қайта оралмаған. Оның жоғалғаны туралы ақпарат әлеуметтік желілер арқылы тарап, жұрттың назарын тудырды.
Балада аутизм диагнозы бар және даму ерекшеліктері байқалған. Іздестіру жұмыстарына полиция қызметкерлері, Ұлттық ұлан сарбаздары мен еріктілер жұмылдырылды.
Түні бойы жалғасқан іздеу жұмыстары нәтижесінде, 15 маусым күні таңертең Аманғали үйінен шамамен 10 шақырым жердегі орман алқабынан аман-есен табылды. Қазір ол дәрігерлердің бақылауында.